فاریاب کې تاوتریخوالی؛ مېړه او ناپېژاندو وسلوالو دوه مېرمنې بې‌رحمانه ووژلې

ځايي سرچینو په فاریاب ولایت کې راپور ورکړی چې په دوو جلا پېښو کې دوه مېرمنې وژل شوې دي. یوه مېرمن د دولت‌اباد ولسوالۍ کې د خپل مېړه له خوا وژل شوې او بله په شیرین‌تګاب ولسوالۍ کې د ناپېژاندو وسلوالو له لوري په ډزو ووژل شوه.د سرچینو د معلوماتو له مخې، هغه مېرمن چې په دولت‌اباد کې وژل شوې وه، ۳۰ کلنه وه. سرچینو زیاته کړې چې مېړه یې پر دې د ښځې د وژلو ګام  پورته کړی چې ګواکې له خپلې خور سره یې ناسمې اړیکې لرلې.ویل کېږي، د دې مېرمن مېړه خپله ښځه او د خپلې ښځې خور په موټر کې د دې په پلمه چې ډاکټر ته ځي، یو ځای ایستلي او د «دوه‌راهي د مالګې کان» په سیمه کې یې خپله ښځه وژلې او بیا د خپلې ښځې له خور سره تښتېدلی دی.د طالبانو ځايي چارواکو تایید کړې چې د دې مېرمن مړی وروسته له هغې وموندل شو چې د هغوی موټر د ریګ‌زار او ځنګل په منځ کې بند پاتې شوی و.په دوهمه پېښه کې، بله مېرمن په شیرین‌تګاب ولسوالۍ کې د ناپېژاندو وسلوالو لخوا په ډزو وژل شوې ده. د دې برید د انګېزې او عاملانو په اړه لا نور جزئیات نه دي خپاره شوي.يادونه شوې ده چې دا دواړه پېښې د فاریاب د اوسېدونکو اندېښنې راپارولي او د طالبانو امنیتي چارواکي وايي چې موضوع څېړي.