د افغانستان د ښځو د جلاوطنۍ خوځښت: «د ښځو پرته ډیموکراسي ناشونې ده»

هممهاله د نړیوالې ډیموکراسۍ ورځې سره، د افغانستان د ښځو د جلاوطنۍ خوځښت په یوه اعلامیه کې ټینګار کړی چې په ننني افغانستان کې د ډیموکراسۍ هېڅ نښه پاتې نه ده او ښځې په سیستماتیک ډول له سیاسي او ټولنیز ژوند څخه ایستل شوې دي.په اعلامیه کې ویل شوي چې د نړیوالې يډیموکراسۍ ورځ د خپلواکي، برابري او د خلکو د سیاسي او ټولنیز برخلیک په ټاکلو کې د ګډون د اصولو یادونه کوي، خو افغانستان د خپل تاریخ په یوه له تر ټولو تیاره پړاوونو کې دی او دا ارزښتونه «په بشپړه توګه له منځه تللي» دي.د ښځو د جلاوطنۍ خوځښت په وینا، افغانې ښځې او نجونې نه یوازې د زده‌کړې، کار او ټولنیز ګډون له حق څخه محرومې شوې دي، بلکې په عملي توګه له ښاریز هویت څخه هم ایستل شوې دي. په اعلامیه کې افغانستان د داسې هېواد په توګه تشریح شوی چېرې چې ډیموکراسي په بشپړ ډول انکار کېږي.خو د ښځو لرې کول یوازې د افغانستان تر پولو محدود نه دی. سلګونه زره افغان ښځې او نجونې چې په ګاونډیو هېوادونو کې مېشتې دي، د جبري ایستلو جدي ګواښ سره مخ دي.اعلامیه زیاتوي چې افغان ښځینه کډوالې په پاکستان او ایران کې نه امنیت لري، نه د زده‌کړې او درملنې کافي لاسرسی، او نه د استوګنې تضمین.د خوځښت په وینا، دا وضعیت «د بشري حقونو ښکاره سرغړونه او د ډیموکراسۍ او د کډوالو د نړیوالو کنوانسیونونو سره ټکر» دی.د افغانستان د ښځو د جلاوطنۍ خوځښت په پای کې ویلي:«موږ د افغانستان د ښځو د جلاوطنۍ خوځښت غړي، په دې نړیواله ډیموکراسۍ ورځ خپل ګډ غږ نړۍ ته رسوو: د ښځو پرته ډیموکراسي ناشونې ده. نن نه یوازې په کابل او هرات کې، بلکې د اسلام‌اباد او تهران په کوڅو کې هم باید د افغان ښځو چوپ شوی غږ واورېدل شي.»دا اعلامیه په داسې حال کې خپره شوې چې په افغانستان کې پر ښځو فشارونه هره ورځ زیاتېږي او هممهاله ګاونډي هېوادونه د افغان کډوالو د ایستلو نوې پلانونه عملي کوي؛ مسأله چې د بشري حقونو او د ښځو د حقونو د مدافعو بنسټونو جدي اندېښنې راپارولي دي.