ګوټېریش: د افغانستان په بشردوستانه مرستو کې د ښځو د کار مخنیوی «احمقانه» دی

د ملګرو ملتونو سرمنشي، انتونیو ګوټېریش، یو ځل بیا د طالبانو پر بنديزونو نیوکه کړې او ویلي یې دي چې د ښځو د بشردوستانه فعالیتونو مخنیوی په افغانستان کې «زغمل کېدونکی نه دی» او «په بشپړه توګه احمقانه» کار دی.هغه د سه‌شنبې په ورځ، د وږي په ۲۵مه، د ملګرو ملتونو په مقر نیویارک کې په یوه خبري غونډه کې د افغانستان اوسنی وضعیت ناورین توګه وباله او ټینګار یې وکړ چې د مرستو د رسولو لپاره د ښځو ګډون «حیاتي او بدیل نه لرونکی» دی.د ملګرو ملتونو د سرمنشي په وینا، دا سازمان هڅه کوي چې هم په مستقیم ډول او هم د نړیوالې ټولنې د ملاتړ په بسیجولو سره طالبان دې ته اړ کړي چې په خپلو سخت‌دریځو تګلارو کې بیاکتنه وکړي.ګوټېریش زیاته کړه: «کله چې ښځې له مرستندویه فعالیتونو وباسي، نیمه ټولنه له اغېزمنو مرستو بې‌برخې کېږي، او دا نه یوازې بې‌عدالتي ده، بلکې د ټولو افغانانو پر زیان تمامېږي.»ملګرو ملتونو او د دې سازمان همکارو بنسټونو څو ځله خبرداری ورکړی چې د طالبانو بنديزونو پر ښځو د مرستو بهیر له جدي خنډونو سره مخ کړی دی. ګڼې د ملاتړ پروګرامونه، په ځانګړي ډول په روغتیايي او ښوونیزو برخو کې، د ښځو له حضور پرته فلج شوي دي.ګوټېریش د افغانستان د بشري وضعیت په اړه وویل چې د داسې حالاتو دوام د نړیوالې ټولنې لپاره د منلو نه دی، او نړۍ باید د دې «ښکاره بې‌عدالتۍ» په وړاندې چوپ پاتې نه شي.طالبانو له اګست ۲۰۲۱ راهیسې په دولتي او نادولتي ادارو کې د ښځو شتون په پراخه کچه محدود کړی دی. د ښځو د کار بندیز په مرستندویه سازمانونو کې د طالبانو له تر ټولو جنجالي پرېکړو څخه دی، چې له پراخو کورنیو او نړیوالو غبرګونونو سره مخ شوی دی.