ملګري ملتونه: له ختیځ زلزله‌ وروسته له ۱۱ زرو ډېرې امیندوارې مېرمنې له جدي خطر سره مخ دي

د ملګرو ملتونو د نفوس صندوق (UNFPA) ویلي چې د یکشنبې شپه، د وږي په ۹مه، په ختیځ افغانستان کې له رامنځته شوې سختې زلزلې وروسته په ځانګړي ډول په کنړ ولایت کې شاوخوا نیم میلیونه تنه بیړنیو مرستو ته اړتیا لري.یاد بنسټ نن چهارشنبه، د وږي په ۲۶مه، په تازه راپور کې ویلي چې د زیانمنو شویو له ډلې شاوخوا ۱۱۹ زره او ۷۶۰ مېرمنې د زېږون په عمر کې دي او ځانګړو روغتیايي اړتیاوو ته اړتیا لري.د راپور پر بنسټ، دا مهال ۱۱ زره او ۶۷۰ مېرمنې امیندوارې دي او د هغوی لپاره بیړني روغتیايي خدمتونه حیاتي او د ژوند ژغورونکي بلل کېږي.دغه صندوق خبرداری ورکړی چې د امیندوارو مېرمنو وضعیت په دې شرایطو کې خورا د اندېښنې وړ دی، ځکه د درملنیزو خدمتونو نشتوالی کولای شي هغوی او د هغوی ماشومانو ته جدي خطرونه رامنځته کړي.په ورته وخت کې، سیمه‌ییز چارواکي او د مرستو بنسټونه وایي چې زرګونه بې‌ځایه شوې کورنۍ د کنړ ولایت د نورګل ولسوالۍ په لنډمهالو پناه ځایونو کې اوسیږي او له پراخو ستونزو لکه د روغتیايي خدمتونو نشتوالی، د خوړو کموالی، د څښاک اوبه او مناسب سرپناه نه شتون سره مخ دي.د ملګرو ملتونو کارپوهان وایي که مرستې پر وخت او پراخې ونه رسېږي، په دغو سیمو کې د انساني ناورین د رامنځته کېدو احتمال زیاتېږي.UNFPA له نړیوالې ټولنې او بشردوستانه بنسټونو غوښتي چې د ناورین د مخنیوي لپاره د اغېزمنو شویو خلکو، په ځانګړي ډول د مېرمنو او ماشومانو، په بیړنیو مرستو کې جدي همکاري وکړي.