نی په جلاوطنۍ کې: طالبان د انټرنېټ په پرېکولو خپلو جنایتونو ته د پټولو هڅه کوي

د افغانستان د آزادو رسنیو د ملاتړ بنسټ (نی) چې دا مهال په تبعید کې فعالیت کوي، ویلي دي چې د انټرنېټ فایبر نوري خدمتونو وروستی پرېکول په یو شمېر ولایتونو کې د طالبانو هغه هڅه ده چې د «ضدبشري جنایتونو د پټولو» او په ځانګړي ډول د نجونو پر زده‌کړې د لا زیاتو محدودیتونو د رامنځته کولو لپاره ترسره کېږي.دغه بنسټ نن پنج‌شنبه، د وږي ۲۷مه، په یوه خپره کړې اعلامیه کې څرګنده کړې چې د طالبانو دا ګام د افغانانو له خورا لومړنیو مدني حقونو سره په ټکر کې دی. د نی په وینا، طالبان د خلکو د پوښتنو پر ځواب ویلو پر ځای هڅه کوي د ازادو اطلاعاتو په خاموشولو سره خپل جنګي جنایتونه او ضدبشري کړنې زیاتې کړي.په اعلامیه کې ویل شوي دي: «طالبان په دې کار سره نه یوازې د خلکو د معلوماتو پر لاسرسي دروازې تړي، بلکې د تاوتریخوالي، د بشري حقونو د نقض او د معترضو غږونو د چوپولو زمینه هم برابروي.»نی په جلاوطنۍ کې خبرداری ورکړی چې د دغسې سیاستونو دوام به د افغانستان خلک تر بل هر وخت زیات د تاوتریخوالي او جنایت له ګواښونو سره مخ کړي او ټولنه به د پراخې چوپتیا او ورانۍ پر لور بوزي.په وروستیو ورځو کې د هېواد په شمال‌ختیځ کې د انټرنېټ پرېکول پراخ غبرګونونه راوپارول. ځايي سرچینو ویلي چې طالبان په یو شمېر ولایتونو کې د انټرنېټ د خدمتونو پر دفترونو یرغل کړی او د هغوی وسایل یې له ځان سره وړي دي. طالبانو تر اوسه په دې اړه څرګندونې نه دي کړي.