اوتونبایوا: د نجونو له زده‌کړې محرومیت د افغانستان لپاره د نسل‌سوځونې ناورین ده

رزا اوتونبایوا، په افغانستان کې د ملګرو ملتونو د مرستندوی پلاوي (یوناما) مشره او د سرمنشي ځانګړې استازې، په خپل وروستي کاري راپور کې خبرداری ورکړی چې د نجونو د زده‌کړې دوامدار محرومیت به د افغانستان راتلونکي ته ویجاړونکي او اوږدمهاله پایلې ولري.نوموړې د چهارشنبې په ورځ، د وږي ۲۶مه، د ملګرو ملتونو د امنیت شورا په غونډه کې وویل چې د شپږم ټولګي پورته د نجونو لپاره د ښوونځیو تړل د یوه بشپړ نسل د نابودۍ خطر رامنځته کړی دی.اوتونبایوا څرګنده کړه چې د طالبانو محدودوونکي تګلارې یوازې د نجونو فردي فرصتونه له منځه نه وړي، بلکې د هېواد پر اقتصادي او ټولنیز پرمختګ هم له جبرانه پورته ضربې رسوي.د هغې په وینا، دغه پرېکړه د افغانانو په منځ کې د نا هیلۍ او یأس خپرېدو لامل شوې او ټولنه یې له نوو بحرانونو سره مخامخ کړې ده.د سرمنشي ځانګړې استازې ټینګار وکړ چې زده‌کړه د هر انسان بنسټیز او مسلم حق دی، او د دې محرومیت دوام افغانستان له پرمختګ او ثباته لا لیرې کوي. هغې له طالبانو وغوښتل چې ژر تر ژره د نجونو پر مخ د ښوونځیو او پوهنتونونو دروازې پرانیزي.یادې څرګندونې په داسې حال کې کېږي چې له ۲۰۲۱ کال راهیسې، کله چې طالبان بیا پر واکمنۍ ورسېدل، نجونو ته د شپږم ټولګي پورته د زده‌کړې اجازه نه ده ورکړل شوې؛ پرېکړه چې پراخې کورنۍ او نړیوالې غبرګونونه یې راپورته کړي دي.