د روغتیا نړیوال سازمان خبرداری ورکړی، چې دې سازمان ته د بشري مرستو د نه رسیدو له امله هره ورځ په افغانستان کې د ۲۴ میندو د مړینې احتمال شته.
دغه سازمان نن (دوشنبه د سنبلې ۶مه) د ایکس پلیټ فارم په یوه پوسټ کې لیکلي چې د روان کال تر پایه د افغانستان خلکو ته د روغتیايي خدمتونو د وړاندې کولو لپاره ۱۲۵ میلیونه ډالرو نورو مرستو ته اړتیا لري.
دغه سازمان هم د مخنیوي وړ ناروغیو له امله د میندو د مړینې د زیاتوالي په اړه اندیښنه ښودلې ده.
دا اندیښنې په داسې حال کې راپورته کیږي چې د روغتیا نړیوال سازمان په خپله نوې غوښتنه کې د 2.43 ملیارد ډالرو تمویل غوښتنه کړې ، او وايي یوازې شاوخوا 108 ملیون ډالر ورکړل شوي.
