یو طالب چارواکی: په افغانستان کې د ښځو پر زده کړو د بندیز لاملونه خلکو ته د ویلو نه دي

د طالبانو د اطلاعاتو او فرهنګ وزارت مرستيال د دغې ډلې په پخواني دريځ ټينګار وکړ او ويې ويل چې اوس مهال په افغانستان کې د ښځو د زده کړې لپاره شرعي شرايط مناسب نه دي.
د طالبانو د اطلاعاتو او فرهنګ وزارت مرستیال یونس رشید ټینګار کړی چې د دغې ډلې مشرتابه د دغه بندیز د دوام لپاره دلایل لري چې له خلکو سره یې شریکول مناسب نه دي.
هغه وويل، چې د دې ډلې مشرتابه په خصوصي غونډو کې پر دې موضوع خبرې کړې دي.
د طالبانو د اطلاعاتو او فرهنګ وزارت د مرستیال دغه څرګندونې په داسې حال کې کېږي چې طالبانو په تېرو دوو کلونو کې په افغانستان کې د ښځو د ژوند په بېلابېلو برخو کې پراخ بندیزونه لګولي دي چې ټول یې د شریعت تر نامه لاندې پلي شوي دي. افغانستان په نړۍ کې یوازینی هېواد دی چې نجونې او ښځې پکې له زده کړو بې برخې دي او دا بندیز درېیم کال ته داخلېږي.