په فراه ولايت کې يو زيږون کلينيک پرانستل شو

د فراه ولايت په مرکز کې د نسايي او ولادي پنځه بستريز خصوصي کلينيک پرانستل شو.
دا په فراه ولایت کې دویم تخصصي کلینیک دی چې د درملنې په برخه کې یې فعالیت پیل کړ.
د فراه ولایت څخه د طالبانو په خبرپاڼه کې راغلي چې دغه کلینک په پرمختللو طبي وسایلو سمبال او د ښځینه ناروغانو لپاره معیاري خدمات وړاندې کوي.
په دې خبرپاڼه کې راغلي دي چې د فراه ولايت د عامې روغتيا رييس د دغه کلينيک د پرانستلو په مراسمو کې وويل چې ټول هېوادوال کولاى شي د افغانستان په هر ولایت کې د درملو او نورو برخو کې پانګونه وکړي.
دا په داسې حال کې ده، چې طالبانو يوه اونۍ وړاندې په کابل کې د يوه خصوصي دوديز درملنې کلينيک د پنځو ښځو په ګډون اته کارکوونکي نيولي او د کلينيک دروازه يې تړلې وه.