د کانکور ازموينې اول نمره : کله چې ښځه زده کړه وکړي، داسې ښکاري چې ټولنې زده کړه کړې ده

د ملي کانکور ازموينې د لومړي مقام ګټونکي له طالبانو وغوښتل چې د نجونو پر زده کړو بنديز دې لغوه کړي.
محمود جان فراهي چې د ملي کانکور د ازموينې د پايلو د اعلان پر بنسټ په دې ازموينه کې لومړى مقام خپل کړى، وايي چې په تېرو کلونو کې زما د هېواد نجونو دغه مقام ترلاسه کړى و او که سږ کال يې هم برخه اخيستې واى دا ممکنه وه چې یوه نجلۍ لومړی مقام ترلاسه کړي.
هغه طالبانو ته وویل: کله چې یو سړی تعلیم یافته وي، یوازې یو سړی لوستی وي. خو کله چې ښځه تعلیم یافته شي نو داسې ښکاري چې ټولنه لوستې ده. له همدې امله موږ غوښتنه کوو چې د ښځو حقوقو ته جدي پاملرنه وشي.
محمود زياته کړه، که ټولنه ښځينه ډاکټرانې، انجينران او ښوونکي ونه لري، د پرمختګ مخه به نيسي.
دا دویم کال دی چې په افغانستان کې د کانکور ملي ازموینه د نجونو له شتون پرته اخیستل کېږي او له شپږم ټولګي پورته نجونې هم د زده کړو اجازه نه لري.