ریچارډ بینیټ: طالبان په سیستماتیک ډول د ښځو او نجونو حقونه تر پښو لاندې کوي او محدودوي

په افغانستان کې د بشري حقونو په برخه کې د ملګرو ملتونو ځانګړي استازي د دغه سازمان د بشري حقونو د شورا په غونډه کې ویلي چې د ښځو پر وړاندې د طالبانو سیاستونه ظالمانه دي او په سیستماتیک ډول د ښځو او نجونو حقونه تر پښو لاندې کوي او محدودوي.
په افغانستان کې د بشري حقونو په برخه کې د ملګرو ملتونو ځانګړي استازي ریچارډ بینیټ په ژنیو کې د ملګرو ملتونو د بشري حقونو د شورا په ۵۴ مه غونډه کې وویل چې سیستماتیک، پراخ او بنسټیز تبعیض چې د ژوند له ټولو اړخونو د ښځو د ګوښه کولو په لټه کې دی، باید وڅیړل شي.
ښاغلي بینیټ په اروپا کې د ښځو د حقونو د فعالانو د نه خوړلو اعتصاب ته هم اشاره کړې چې په افغانستان کې د جنسیتي توپیر د پیژندلو غوښتنه کوي.
هغه له طالبانو وغوښتل چې خپل ظالمانه او ناوړه سیاستونه بدل کړي او ښځو ته د کار او سوداګرۍ اجازه ورکړي.
د پرونۍ غونډې په پای کې، په افغانستان کې د ښځو او نجونو د وضعیت په اړه د پوښتنې په ځواب کې، بینیټ وویل چې وضعیت په بشپړه توګه د منلو وړ نه دی او د بشري حقونو شورا او نورو بنسټونو ته اړتیا ده چې د دې مسلې د حل لپاره اقدامات وکړي.
هغه وویل، په افغانستان کې د ښځو پر وړاندې د تبعیض د له منځه وړلو کنوانسیون او په دې برخه کې له نورو نړیوالو تړونونو سرغړونه شوې او د عدالت نړیواله محکمه باید د افغان ښځو غږ واوري.