وسلوالو غلو په لوګر کې یوه مور له لور سره وژلې ده

وسلوالو غلو د لوګر په ولایت کې یوه شپېته کلنه ښځه له خپلې دیارلس کلنې لور سره وژلې ده.د طالبانو سیمه‌ ییزو چارواکو ویلي چې غلو لومړی مور او لور بې‌ هوشه کړې او وروسته یې د تبر په واسطه وژلي، او د وژنې وروسته یې مړي په صندوق کې اچولي دي.د لوګر د امنیې قوماندانۍ د شنبې په ورځ (د لړم ۱۷مه) په یوه خبرپاڼه کې ویلي چې د قتل او غلا په تړاو دوه تنه د پل‌ علم ښار د عمرآباد په سیمه کې نیول شوي دي.دغه غلو څلور زره امریکايي ډالر او دوه لکه افغانۍ هم له ځان سره وړي دي.دا په داسې حال کې ده چې د طالبانو چارواکي تل وایي چې د افغانستان امنیت بشپړ تامین شوی، خو ګڼ شمېر اوسېدونکي باور لري چې دا ډول وژنې د اګست ۲۰۲۱ وروسته ډېرې شوې دي.