په پاکستان کې افغان کډوال: مه مو بېرته افغانستان ته استوئ

یو شمېر افغان کډوالو په پاکستان کې په یوه پرانستې لیک کې د پاکستان له لومړي وزیر شهباز شریف څخه غوښتي چې د افغان کډوالو د شړلو لړۍ بنده کړي.دغه افغان اتباع نن (چهارشنبه، د لړم ۲۱مه) ویلي چې که بېرته افغانستان ته ستانه شي، د ژوند او مرګ له جدي خطر سره به مخ شي.هغوی ټینګار کړی چې طالبان له پخواني حکومت سره د تړلو کسانو او د نړیوالو ځواکونو له همکارانو سره د انتقام چلند کوي.په دې لیک کې راغلي: «موږ له د پاکستان له حکومت څخه غوښتنه کوو چې د هغو افغانانو د ایستلو پرېکړه وځنډوي یا لغوه کړي چې د امریکا د بیا مېشتېدو په پروګرامونو کې شامل دي، ځکه زموږ ستنېدل به زموږ د ژوند او ازادۍ مستقیم ګواښ وي.»د لیک لاسلیک کوونکو له د پاکستان حکومت غوښتی چې د امریکا له سفارت سره په همغږۍ، د افغان کډوالو د دوسیو د ارزونې بهیر ګړندی کړي څو دا کسان له نامعلوم وضعیت څخه ووځي او په یو خوندي هېواد کې پناه ومومي.په لیک کې همدارنګه له شهباز شریف غوښتنه شوې چې د ویزو د قانوني تمدید بهیر بېرته فعال کړي، څو کډوال وکولای شي خپلې ویزې په قانوني ډول وغځوي او له نیونې خوندي پاتې شي.دا په داسې حال کې ده چې له ۲۰۲۱ کال د اګست راهیسې، کله چې طالبان یو ځل بیا پر افغانستان واکمن شو، زرګونه افغانان د امریکا د P1 او SIV پروګرامونو د تعقیب لپاره پاکستان ته کډوال شوي دي.