آنانیومن: طالبانو خپلې ژمنې نه دي پوره کړي

د اروپا په پارلمان کې د آلمان استازي پر طالبانو تور ولګاوه چې په لومړي سر کې یې د ژمنې خلاف عمل کړی دی.
په اروپايي پارلمان کې د جرمني استازې آنانیومن وايي، په افغانستان کې د پخواني حکومت کارکوونکي د طالبانو تر ګواښ لاندې دي، ښځې هم تفریحي مرکزونو ته نه شي تلای او ښوونځي د جهاد په مرکزونو بدل شوي دي.
نوموړي د اروپايي پارلمان د سخاروف جايزې ترلاسه کولو لپاره د مرضبه اميري، مطيع الله ويسا او پرستو حکيم د نوماندۍ يادونه وکړه او ويې ويل، چې دا کار افغانستان ته د رسنيو د پام اړولو، د طالبانو پر وړاندې د مقاومت د ډېرو کسانو د پېژندلو او ساتنې لپاره مهم دى.
د اروپايي پارلمان دغه غړي لا هم په افغانستان کې د جنسیتي تبعیض د رسمي پېژندلو غوښتنه کړې ده.
له څه باندې دوو کلونو راهیسې چې طالبانو پر افغانستان واک تر لاسه کړی، دغې ډلې د ښځو او نجونو د ژوند په ټولو اړخونو کې پراخ محدودیتونه وضع کړي او له نړیوالو غبرګونونو سره سره بیا هم له خپل دریځه شاتګ نه دی کړی.