د ملګرو ملتونو د خوړو نړيوال پروګرام: زلزله ځپلو ته د خوراکي توکو د مرستو د وېش لړۍ پيل شوه

د ملګرو ملتونو د خوړو نړيوال پروګرام (WFP) د افغانستان په لوېديځ کې له زلزله ځپلو سره د مرستو د لېږلو اعلان وکړ.
د خوړو نړیوال پروګرام په X ټولنیزه شبکه کې لیکلي چې د مرستو ویش د دوشنبې په ورځ (د تلې ۱۷مه) پیل شو.
د دې موسسې په مرستو کې اوړه، غوړي، حبوبات او مالګه شامل دي او د یوې اووه کسیزې کورنۍ د یوې میاشتې خوراکي اړتیاوې پوره کولای شي.
په همدې حال کې په افغانستان کې د ترکیې سفارت اعلان کړی چې په هرات کې د دغه هېواد قونسل جنرال له زلزله ځپلو سیمو څخه د لیدنې پر مهال له ۵۰۰ زلزله ځپلو کورنیو سره د مرستې کڅوړې وېشلې دي.
تر دې مخکې د ایران د بهرنیو چارو وزیر حسین امیر عبداللهیان اعلان کړی و چې هېواد به یې د هرات زلزله ځپلو ته مرستې ولېږدوي.