د پوليو واکسين کمپاين به سبا د افغانستان په څوارلسو ولايتونو کې پيل کیږي

د “پولیو څخه پاک افغانستان” په نوم یوې موسسې په ایکس ټولنیزه شبکه کې لیکلي دي چې د لړم په لومړۍ نیټه د دوشنبې په ورځ په افغانستان کې د پولیو د واکسین کمپاین پیلیږي.
د دغه سازمان د معلوماتو له مخې، دغه کمپاین به په کابل، کاپیسا، پروان، تخار، کندز، بغلان، نورستان، کنړ، لغمان، ننګرهار، خوست، پکتیا، پکتیکا او غزني ولایتونو کې پیل شي.
له پولیو څخه د پاک افغانستان ټولنې د دغو ولایتونو له اوسېدونکو غوښتي، چې ټول له پنځو کلونو کم عمره ماشومان واکسین کړي، څو له افغانستانه پولیو له منځه ولاړه شي.
افغانستان او پاکستان په نړۍ کې هغه دوه هېوادونه دي چې تر اوسه پکې د پولیو کچه صفر ته نه ده رسېدلې او سږ کال په ننګرهار ولایت کې د پولیو څلور مثبتې پېښې ثبت شوې دي.