په بلخ کې سیمه ییزې سرچینې وايي، طالبانو د دغه ولایت په مرکز مزار شریف ښار کې په یوه سوداګریز مارکېټ کې لږ تر لږه ۱۵ ښځینه خیاطۍ تړلې دي.
سرچينه وايي، چې د طالبانو استازو نن دوشنبه، د “رلال” په نوم په يوه سوداګريز مارکېټ کې د دغو ښځو خياطۍ تړلې دي.
د دغو ښځو د ګنډلو د دوکانونو خاوندان وايي، چې طالبانو دوی ته امر کړی و، چې خپل دوکانونه د خدیجې کبرې په نوم د ښځو لپاره ځانګړي سوداګریز مارکېټ ته انتقال کړي.
دوی وايي چې د طالبانو د دغه حکم د نه منلو له امله د دوی دوکانونه د دغې ډلې له خوا تړل شوي دي.
دغه مېرمنې وايي چې د پېرېدونکو د کموالي له امله نه غواړي خپل دوکانونه د ښځو لپاره د طالبانو له خوا جوړ شوي مارکېټ ته انتقال کړي.
د دوی په خبره، په زلال مارکېټ کې د دوی د ګنډلو دوکان هم په یوه جلا تالار کې دی او نارینه په دې تالار کې د تګ اجازه نه لري.
طالبانو تر دې مخکې هم په بېلابېلو مواردو کې د ښځو پر کاروبارونو بندیزونه لګولي دي.
