د ګالپ Gallup په نوم ټولنه چې د بېلابېلو نړیوالو مسایلو په اړوند څېړنې کوي د جولای میاشتې د نظرپوښتنې په اساس پرون (جمعه) په یوه تازه راپور کې وویل چې په افغانستان کې دننه د ښځو او نجونو او همداراز د هغو سلګونه زره بې اسناده کډوالو مېرمنو چې له پاکستانه ایستل کېږي، لرلید تیاره ښکاري.
د دې نظرپوښتنې په سلو کې یوازې ۱۱ ګډونوالو ښځو ګالپ ته ویلي دي چې له خپلې ازادۍ څخه راضي دي او په سلو کې یوازې ۱۷ ویلي چې په درناوي چلند ورسره کېږي خو تقریبا ټولو ګډونوالو ویلي چې کړاوونه یې دوام لري.
د ګالپ نظرپوښتنې ښيي چې پر افغانستان د طالبانو له واکمنېدو وروسته تقریبا ټولې افغان مېرمنې په ناخوالو کې ژوند کوي او دا احساس لري چې د درناوي په اساس چلند نه ورسره کېږي.
ګالپ نړیواله تحقیقاتي ټولنه ده چې په ټوله نړۍ کې د بېلابېلو مسایلو په اړه تحقیقاتي او څېړنيزې نظرپوښتني کوي.
