کاناډايي رسنۍ وايي شپږ افغانې کورنۍ چې د کاناډا د مهاجرت کیسونه یې درلودل، له پاکستانه بېرته افغانستان ته اخراج شوي دي.
د کاناډا یوه پخواني پوځي جان فلتهم (Jon Feltham) ویلي، د دغو افغانانو د اخراج په اړه د پاکستان دریځ ډېر اندېښمن کړي دي.
فلتهم د امن لارا په نوم د هغه غیرانتفاعي بنسټ د پروګرامونو مدیر دی، چې له بحراني هېوادونو د خلکو د ایستلو مسوولیت لري.
هغه ویلي هڅه کوي، چې دغه کورنۍ له افغانستانه وباسي.
ګڼ افغانان چې د امریکاد متحدو ایالتونو، کاناډا او نورو اروپايي هېوادونو د مهاجرت کیسونه لري، په پاکستان کې دېره دي، خو د نومبر میاشتې له لومړیو له پاکستانه د افغان کډوالو د ډله ییز اخراج له کبله د دغو کسانو په باب هم اندېښنې زیاتې شوې دي.
تر دې مخکې ځینو نورو کسانو چې د امریکا د مهاجرت کیسونه لري هم شکایت کړی و، چې له اړتیا وړ اسنادو سره- سره د پاکستان پولیسو افغانستان ته ایستلي دي.
