د معترضې مېرمنې بهارې کریمي یوې خپلوانې ادعا کړې چې طالبانو نوموړې د اکټوبر په ۱۷مه د کابل ښار په جمال مېنه کې له خپل کور څخه بېولې ده.
هغې چې نه يې غوښتل نوم يې خپور شي وويل، دا کار يو شمېر وسله والو چې يوه ښځه هم ورسره وه کړی دی.
سرچينې زياته کړې چې د طالبانو حکومت د نوموړې د نيول کېدو په اړه د هغې له کورنۍ او دوستانو سره جزیات نه دي شريک کړي.
په تېرو څو مياشتو کې د ژوليا پارسي، ندا پرواني، پاريسا ازاده او منیژه صديقي په ګډون څو نورې اعتراض کوونکې ښځې هم د طالبانو له خوا نيول شوې دي او له نړيوالو غبرګونونو سره -سره تر اوسه د دوی برخليک نه دی معلوم.
د طالبانو حکومت تر اوسه د دغو کسانو نيول نه تاييد او نه هم رد کړي، خو د ښځو د حقونو يو شمېر فعالانو د بهارې کريمي نيول کېدل تاييد کړي دي.
