د بخښنې نړیوال سازمان په وروستیو ورځو کې د طالبانو له خوا د نیول شویو ښځو د ناڅرګند برخلیک په اړه د اندېښنې په څرګندولو سره، ټینګار کړی چې طالب چارواکي باید «بې له ځنډه» دا ځپل ودروي او نیول شوي کسان خوشي کړي.
دغه سازمان همداراز زیاته کړې چې د طالبانو له خوا ځپل او خپلسري نیول په افغانستان کې «د بیان له آزادۍ د لازیاې سرغړونې» ښودنه کوي.
د بخښنې د نړیوال سازمان د راپور له مخې، طالبانو ګڼ شمېر مېرمنې «د دوی د خوښې وړ حجاب د نه رعایتولو» له امله نیولي دي.
دا غبرګون په داسې حال کې کېږي چې په دې وروستیو کې د طالبانو امربالمعروف او نهی عن المنکر وزارت، رسنیو ته تایید کړې چې په کابل کې یو شمېر مېرمنې د بې حجابۍ له امله نیول شوې دي؛ خو دغه وزارت نه ده روښانه کړې چې د نیول شویو ښځو او نجونو شمېر څو تنه دی.
له بلې خوا، په ملګروملتونو کې د افغانستان دایمي استازي نصیراحمد فایق ویلي چې د طالبانو په واکمنۍ کې خلک «فکري امنیت او آرامي» نه لري.
ښاغلي فایق پر ایکس ټولنیزه شبکه زیاتوي: «ښځو ته درناوی او د ناموس ساتنه، تل د افغانانو د فرهنګ، ارزښتونو او اسلامي اصولو برخه ده.»
د هغه په وینا، له دې مخکې د افغانستان په هېڅ یوه واکمنۍ کې دا درناوی او کلتور تر پښو لاندې نه دی شوی.
