د افغانستان د نجونو، ښځو او بشري حقونو لپاره د امریکا ځانګړې استازې رینا امیري وايي، په افغانستان کې د اقتصادي بې ثباتۍ، افراطیت او د جګړې د دوام د مخنیوي لپاره بشري حقونه او په ټولنه کې د ښځو بشپړ ګډون اړین دی.
رینا امیري د چهارشنبې په ورځ په خپله ایکس پاڼه کې لیکلي چې دوی باید په افغانستان کې بشري حقونه پیاوړي کړي.
هغې زیاته کړې، په ټولنه کې د ښځو هر اړخیزه ونډه له پامه نه شي غورځول کېدای او یا هم دوی له لومړیتوبونو څخه نه شي ايستل کېدای.
نوموړې دا هم ویلي چې د طالبانو تر واک لاندې افغانستان کې، بشري وضعیت او بشري حقونه په ځانګړې توګه د افغان ښځو او نجونو لپاره خورا ویجاړونکي دي.
په ورته وخت کې یو شمېر ښځې او نجونې چې د طالبانو تر واکمنۍ لاندې په افغانستان کې ژوند کوي وايي چې په دې هېواد کې د ښځو د ژوند شرایط ورځ تر بلې سختېږي او څوک نشته چې د دوی غږ واوري.
سره له دې ریچارډ بینېټ په خپل راپور کې ویلي چې طالبان د افغانانو د بشري حقونو په ساتنه کې پاتې راغلي او په ځانګړې توګه د نجونو او ښځو له اساسي حقونو ته د دوی بې احترامي په نړۍ کې بې سارې ده.
