په افغانستان کې له څلورو میلیونو زیاتې میندې او ماشومان له خوارځواکي سره مخ دي

د خوړو نړیوال پروګرام: په افغانستان کې له ۴ میلیونو زیاتې میندې او ماشومان له خوارځواکي سره مخ دي
د ملګرو ملتونو د خوړو نړیوال پروګرام ویلي، چې په افغانستان کې له څلورو میلیونو زیاتې میندې او ماشومان د خوارځواکۍ ښکار شوي دي.
یاد پروګرام نن (چهارشنبه، د غبرګولي ۷مه) په خپل ایکس‌پاڼه کې په یوه خبرپاڼه کې لیکلي، چې د دغو مېرمنو یوه برخه د روغتیا د نړیوال سازمان په مرسته تر درملنې لاندې ده.
دې ادارې تر دې مخکې خبرداری ورکړی و، چې تر ۲۰۲۵ کال پورې ښايي ۳.۵ میلیونه نور ماشومان هم له خوارځواکي سره مخ شي.
د یادونې ده، چې دوامداره فقر، د روغتیايي خدمتونو کمزوری سیستم، اقلیمي بدلونونه او د نړیوالو مرستو کموالی لامل شوي، چې میلیونونه افغانان – په ځانګړې توګه حامله، شیدې ورکوونکې ښځې او تر پنځه کلنۍ کم عمره ماشومان – کافي او مقوي غذا ته لاس‌رسی ونه‌لري.