نړیوالو بنسټونو له پاکستان نه وغوښتل: د افغان خبریالانو جبري ایستنه سمدستي ودروئ

د خبریالانو د خوندیتوب نړیوالې کمېټې او ۱۳ نورو نړیوالو بنسټونو له پاکستانه غوښتنه کړې چې د افغان خبریالانو جبري ایستنه بنده کړيد خبریالانو د خوندیتوب نړیوالې کمېټې (CPJ) او ۱۳ شریکو نړیوالو بنسټونو په یوه ګډه اعلامیه کې له پاکستاني چارواکو غوښتي چې سمدستي دې د افغان خبریالانو او هغو وګړو جبري ایستنه ودروي چې د طالبانو له لوري له ګواښ سره مخ دي.په دې اعلامیه کې چې نن چهارشنبه (۷ غبرګولی) خپره شوې، د پاکستان د “ناقانونه کډوالو د بېرته استولو پلان” په اړه ژوره اندېښنه څرګنده شوې ده؛ یاد پلان د ۲۰۲۳ کال د اکتوبر په ۳مه د پاکستان د چارواکو له‌خوا اعلان شوی و.د یادونې وړ ده چې له افغانستان څخه د طالبانو تر واکمنېدو وروسته، سلګونه خبریالان، د رسنیو کارکوونکي، لیکوالان او هنرمندان اړ شول چې له هېواده ووځي. ډېری یې د خپلو رسنیزو فعالیتونو، د اعتراضونو د پوښښ، یا د بشري حقونو د نقض راپورونو له امله له ګواښ، نیونې یا تاوتریخوالي سره مخ شوي دي. پاکستان یو له هغو هېوادونو څخه و چې زرګونه افغان خبریالان یې منلي، خو د ملاتړ بنسټونو نشتون، قانوني بندیزونه او د ایستنې خطر، د دغو خبریالانو وضعیت له جدي بحران سره مخ کړی دی.