طالبانو ۲۳ تنه، چې یوه ښځه هم پکې شامله ده، په کابل، تخار، کندز او کنړ کې په درو وهلي دي

طالبانو ۲۳ تنه، چې یوه ښځه هم پکې شامله ده، په کابل، تخار، کندز او کنړ کې په دورو وهلي دي په تازه قضايي ګام کې، د طالبانو د استیناف محکمې ۲۳ تنه کسان، چې یوه ښځه هم په کې شامله ده، د لواطت، غلا، د نشه‌يي موادو کارونې، بې‌حرمتي، نامشروع اړیکو او اخلاقي فساد په تور په کابل، تخار، کندز او کنړ ولایتونو کې په دورو وهلي دي.د محکمې له‌خوا نن (پنج‌شنبه، د غبرګولي ۸مه) خپره شوې اعلامیه ښيي چې له دغو کسانو څخه ۱۶ تنه په کنړ، ۳ تنه په کابل، ۲ تنه په کندز او ۲ تنه نور په تخار کې په بېلابېلو جرمونو تورن پېژندل شوي او د شپږو میاشتو تر یو کال پورې حبس اجرایي او له ۱۰ تر ۳۹ درو پورې سزا ورکړل شوې ده. دا پرېکړې د طالبانو د سترې محکمې له وروستي تائید وروسته عملي شوې دي.خو سره له دې چې دا ډول سزاوې د طالبانو له‌خوا د شریعت اسلامي د تفسیر له مخې اجرا کېږي، د بشري حقونو د نړیوالو معیارونو له نظره له سختو نیوکو او اندېښنو سره مخ دي.