د یوناما استازې بامیان ته: د نجونو زده‌کړه او د ښځو ونډه اړینه ده

د ملګرو ملتونو د سیاسي چارو استازې بامیان ته په سفر کې د نجونو پر زده‌کړو ټینګار وکړجورجټ ګانیون، د ملګرو ملتونو د سیاسي استازولۍ د یوناما مرستیاله استازې، په خپل وروستي سفر کې بامیان ته، د نجونو د تعلیم او د ښځو د ټولنیز رول پر ارزښت ټینګار کړی دی.د یوناما په فېسبوک پاڼه کې نن (پنج‌شنبه، د غبرګولي ۸مه) خپره شوې خبرپاڼه کې ویل شوي چې نوموړې له ښځو، ټولنیزو فعالانو، ښځینه خبریالانو او د عامې روغتیا له کارکوونکو سره لیدلي، او د ښځو او نجونو د ستونزو او بندیزونو په اړه یې خبرې کړې دي.ګانیون ویلي، زده‌کړه، اساسي خدماتو ته لاسرسی او د ښځو فعاله ونډه په ټولنیز پرمختګ کې، د ملګرو ملتونو له اړینو ژمنو څخه دي چې له افغان ولس سره یې لري.هغې د دې سفر په ترڅ کې د بامیان له راډیو هم لیدنه کړې؛ چیرې چې ښځینه خبریالانو له نړیوالو بنسټونو څخه د سیمه‌ییزو او خپلواکو رسنیو د ملاتړ دوام وغوښت.دا سفر په داسې حال کې شوی، چې لا هم ډېرې افغانې ښځې، په ځانګړي ډول په لرې پرتو سیمو کې، له زده‌کړې، روغتیايي خدماتو او کار ته له جدي بندیزونو سره مخ دي.