افغان ایوک: د ټرمپ حکومت غواړي د افغان کډوالو د مرستې «اندورینګ ویلکم» دفتر وتړي

په امریکا کې د افغان کډوالو د ملاتړ یو بنسټ، چې «افغان ایوک» نومېږي، خبر ورکړی چې د دونالد ټرمپ اداره د افغانستان د بې‌ځایه شویو د همغږۍ له دفتر (CARE) وروسته اوس هڅه کوي چې د «اندورینګ ویلکم» دفتر وتړي؛ دا هغه اداره ده چې د افغان کډوالو د بیا مېشتېدو په بهیر کې مهم رول لري.
افغان ایوک نن (شنبه، د غبرګولي ۱۰مه) په یوه خبرپاڼه کې ویلي، له هغه وخته چې کابل د ۲۰۲۱ کال د اګست په میاشت کې سقوط وکړ، دوی د شاوخوا ۲۰۰ زره افغانانو د بیا مېشتېدو په بهیر کې برخه اخیستې ده. خو اوس چې CARE دفتر تړل شوی او «اندورینګ ویلکم» هم له ګواښ سره مخ دی، د هغو زرګونو افغانانو راتلونکې ته اندېښنې زیاتې شوې دي چې د اسکان په تمه دي.
د CARE دفتر هغه مهال جوړ شوی و چې امریکايي ځواکونه له افغانستانه ووتل او یاد دفتر تر ۱۱۸ زره ډېر افغانان د مېشتېدو له پاره مرسته کړي وو. خو امریکايي رسنیو ته سرچینو ویلي چې دا دفتر پرته له عامه اعلان څخه تړل شوی دی.