د روغتیا نړیوال سازمان: په افغان ځوانانو کې د تنباکو کارول ډېر شوي دي

هم‌مهاله د تنباکو د نه کارونې نړیوالې ورځې سره، په افغانستان کې د روغتیا نړیوال سازمان استازی ادوین سنیزا سالوادور، په افغان ځوانانو کې د تنباکو د کارونې د زیاتوالي په اړه اندېښنه څرګنده کړې ده.نوموړي نن (شنبه، د غبرګولي ۱۰مه) په ایکس شبکه کې په خپاره کړي پیغام کې ویلي: «د تنباکو تولیدوونکي شرکتونه د خوندونو، ښایسته بستې او غولوونکو اعلانونو له لارې اصلي خطرونه پټوي. دغه شرکتونه په بې لارې کوونکو تګلارو سره نوي کاروونکي ځان ته راکاږي او زاړه کاروونکي روږدي ساتي، چې پایله یې ناروغۍ، بې‌وزلي او ژر مړینې دي.»ښاغلی سالوادور زیاته کړې، چې په افغانستان کې په ځانګړي ډول د تنکيو هلکانو تر منځ د تنباکو کارول مخ په ډېرېدو دي، او دا کړۍ باید ژر ماته کړل شي، ترڅو راتلونکی نسل د دې له زیانونو خوندي پاتې شي.بل‌خوا، اسلامي امارت ادعا کوي چې په افغانستان کې د مخدره توکو کر، تولید او قاچاق صفر ته راټیټ شوی دی.