د ملګرو ملتونو د نفوس صندوق: ۹۰۰ زره قابله‌وو ته سمدستي اړتیا ده؛ مېرمنې او نجونې له پامه غورځول شوي

د ملګرو ملتونو د نفوس صندوق (UNFPA) نن (د جوزا ۱۱مه) پر ایکس لیکلي، نړۍ دا مهال له ۹۰۰ زره قابله‌وو سره کموالی لري، او په داسې حال کې چې زرګونه مېرمنې او نجونې د ژوند ژغورلو لپاره د قابله‌ګۍ خدماتو ته اړتیا لري، لا هم له پامه غورځول کېږي.یاد صندوق ټینګار کړی چې مسلکي قابله‌وې، په ځانګړي ډول د بېړنیو حالتونو پر مهال، د انسانانو د ژغورنې لپاره حیاتي رول لري.د UNFPA د معلوماتو له مخې، که چیرې قابله‌وې ښه روزل شوې وي او د کار لپاره لازم شرایط ولري، نو کولای شي تر دوه پر درې برخې پورې د میندو او نویو زیږېدلو ماشومانو د مړینې مخه ونیسي.دا بنسټ زیاتوي چې قابله‌وې د تولید مثلي، جنسي، او مور او ماشوم د روغتیا په برخه کې ۹۰ سلنه کلیدي خدمات وړاندې کولای شي، خو بیا هم یوازې ۱۰ سلنه د روغتیايي سیستم له کاري ځواک څخه جوړوي. دا وضعیت د دوامدارو پانګونو او ملاتړ نشتوالي ته اړوند بلل شوی.د یادونې وړ ده چې افغانستان په نړۍ کې د میندو د مړینې له پلوه اووم ځای لري.