یونیسف: په افغانستان کې میلیونونه ماشومان د ښځینه ښوونکو د نشتوالي له امله له زده‌کړو پاتې دي

د ملګرو ملتونو د ماشومانو د ملاتړ صندوق (یونیسف) خبرداری ورکړی چې نږدې څلور میلیونه ماشومان په افغانستان کې له زده‌کړو بې‌برخې دي. دې ادارې ویلي، د زده‌کړو لپاره د لازم چاپېریال نشتوالی، پاکو اوبو ته نه‌لاسرسی، او د ښوونکو، په ځانګړي ډول د ښځینه ښوونکو کمښت، د دې ستونزې اصلي عوامل دي.په راپور کې ویل شوي چې اقتصادي ستونزې هم د ماشومانو د زده‌کړو پرېښودو لوی لامل دی، ځکه ډېری کورنۍ د بې‌وزلۍ له امله خپل ماشومان اړ باسي چې کار وکړي.یونیسف زیاتوي چې هڅه کوي د ښځینه ښوونکو د جذب له لارې، کلتوري خنډونه کم کړي، ځکه ډېرې کورنۍ یوازې هغه مهال خپلو لوڼو ته د زده‌کړو اجازه ورکوي چې ښوونکې ښځې وي.پر دې سربېره، هغه بندیزونه چې د طالبانو له لوري پر نجونو د شپږم ټولګي پورته زده‌کړو لګول شوي، لامل شوي چې په ۲۰۲۵ کال کې له دوو میلیونو زیاتې نجونې له زده‌کړو بې‌برخې پاتې شي.