له ګاونډیو هیوادونو څخه له ۷۰۰ زیاتې افغان کډوالې کورنۍ په یوه ورځ هېواد ته راستنې شوي

د باختر دولتي خبري آژانس، چې د اسلامي امارت تر کنترول لاندې فعالیت کوي، راپور ورکړی چې یوازې د پرون ورځې په اوږدو کې ۷۴۲ افغان کورنۍ له بېلابېلو پولو څخه هېواد ته راستنې شوې دي.د نن (دوشنبه، د جوزا ۱۲مه) خپرو شوو معلوماتو له مخې، له دې ډلې څخه ۸۲ کورنۍ د ننګرهار له تورخم دروازې، ۵۸ کورنۍ د کندهار له سپین‌بولدک، او ۱۶۲ کورنۍ د نیمروز له پول ابریشم دروازې څخه افغانستان ته داخل شوي دي.همداراز، یوه کورنۍ د پکتیکا ولایت د انگور اډې له لارې، ۷ کورنۍ د هلمند له بهرامچې دروازې، او تر ټولو ډېرې، یعنې ۴۳۳ کورنۍ د هرات ولایت له اسلام‌قلعې څخه هېواد ته راستانه شوي دي.دا پراخ راستنېدنه داسې مهال شوې چې ډېری له دغو کورنیو کلونه کلونه په ګاونډیو هیوادونو، په ځانګړې توګه ایران او پاکستان کې مېشتې وې. اقتصادي ستونزې، امنیتي فشارونه، او د دغو هېوادونو سختې مهاجرتي پالیسۍ د کډوالو د جبري یا داوطلبانه راستنېدو عمده لاملونه بلل کېږي.