د افغانستان د شنونکو شبکه: په امریکا کې د افغان کډوالو وضعیت د ټرامپ د بیا واکمنېدو وروسته بحراني شوی

د افغانستان د شنونکو شبکه په یوه تحلیلي راپور کې ویلي چې د افغانستان د جمهوریت د سقوط (اګست ۲۰۲۱) وروسته نېږدې ۲۰۰ زره افغانان متحده ایالاتو ته پناه وړې ده. ډېری یې په ټیکساس، کالیفورنیا، ویرجینیا او پنسیلوانیا ایالتونو کې مېشت شوي دي. خو اوس، د دونالد ټرامپ د بیا واکمنېدو او د څو اجرایي فرمانونو د صادرېدو له امله، د زرګونو افغانانو د پاتې کېدو او راتلونکي وضعیت جدي ننګونې سره مخ شوی دی.دغه شبکه وایي چې د افغان کډوالو لپاره د «موقتي ساتنې» پروګرام د بشري شرایطو په اساس درول او د نورو فرمانونو سره یو ځای، داسې کسان چې په افغانستان کې په خطر کې دي، نور نشي کولای دې پروګرام ته غوښتنه ورکړي او یا یې له لارې امریکا ته داخل شي.په دې راپور کې چې د یکشنبې (د جوزا ۱۱مه) خپور شوی، ویل شوي چې اوس مهال شاوخوا ۱۰ زره افغان وګړي د «موقتي ساتنې» لاندې په امریکا کې ژوند کوي؛ خو د دونالد ټرامپ په مشرۍ حکومت دوی ته د امریکا پرېښودو خبرتیاوې ورکړي او د جبري ایستلو په خطر کې دي.په امریکا کې د افغانانو شمېره تر جمهوریت د سقوط مخکې شاوخوا ۱۳۲ زره وه، خو د ۲۰۲۱ کال له اګست وروسته د پراخ کډوالي له امله دغه شمېره تر ۲۰۲۴ کال پورې له ۲۲۰ زرو څخه واوښتله. سره له دې، ډېری هغه افغانان چې له ۲۰۲۱ کال وروسته امریکا ته داخل شوي، لا هم دایمي اوسېدنې حالت نه لري او د قانوني تعلیق په حالت کې دي.