د طالبانو د عامې روغتيا وزارت د بهرنیو فارغانو د ارزونې بهیر پیل کړ؛ د ښځو ګډون ته هېڅ اشاره نه ده شوې

د طالبانو د عامې روغتيا وزارت اعلان کړی چې هغه کسان چې د هېواد څخه بهر یې د روغتيا په برخو کې زده‌کړې کړې دي، له هغوی څخه د اسنادو ارزونې او ازموينې بهير پيل شوی دی.د دغه وزارت په خبرپاڼه کې چې نن دوشنبه (۱۲ د غبرګولي) خپره شوې، راغلي چې دا بهير به د غبرګولي له ۲۰مې نېټې څخه تر ۱۵ د زمري میاشتې پورې دوام وکړي.وزارت ويلي، ټول غوښتونکي به د ازموينې او تحصيلي اسنادو تر کتنې وروسته، که بریالي شي، د هېواد د روغتيايي سکتور په رسمي توګه د کار اجازه تر لاسه کړي.خو په دې خبرپاڼه کې د ښځو ګډون، ونډې یا اسانتیاوو په اړه هېڅ وضاحت نه‌دی ورکړل شوی، چې دا چاره د افغانستان د روان روغتيايي حالت په پام کې نیولو سره د اندېښنې وړ بلل کېږي.روښانه نه‌ده چې څومره ښځینه فارغانې دا بهیر تعقیبوي او دغه ارزونه به څومره وکولای شي د ښځینه روغتیايي کارکوونکو کمښت جبران کړي.