طالبانو: د لویدیځو ویښتو سټایلونه ځوانان له اسلامي ارزښتونو لرې کوي

د طالبانو د امر بالمعروف وزارت ویلي چې د دغه وزارت مامورینو په دایکنډي ولایت کې له یو شمېر سلمانیانو سره لیدلي، څو د دوی په وینا د وارداتي او لویدیځو ویښتو سټایلونو له خپرېدو مخه ونیسي.
د دغه وزارت له‌خوا د سه‌شنبې په ورځ، د جوزا ۱۳مه خپره شوې خبرپاڼه کې ویل شوي چې عبدالمنان شهیدزاده، په دایکنډي کې د امر بالمعروف رئیس، ویلي چې د ویښتو اصلاح که د اسلامي شریعت خلاف وي، نو دا یو څرګند منکر دی، او له سلمانیانو یې غوښتي چې د دغه منکر د له‌منځه وړلو لپاره همکاري وکړي.
یاد طالب چارواکي خبرداری ورکړی چې د لویدیځو ویښتو سټایلونو پراخېدل کولای شي ځوان نسل له اسلامي ارزښتونو او ملي هویت څخه لرې کړي.
دا لومړی ځل نه‌دی چې طالبان د خلکو د ژوند جزئیاتو ته مداخله کوي. له ږیرې خریلو بندیزه نیولې، تر د ښځو پر آرایش‌ګاو، پارکونو او حتی حمامونو د بندیز پورې، دغه ډله تل هڅه کړې چې د خلکو بڼه او د ژوند طرز د خپلې شریعتې لیدلوري له مخې بدل کړي.