د افغانستان د خبریالانو د ملاتړ سازمان: د ښځینه خبریالانو پر کار بندیز د بشر حقونو ښکاره نقض دی

د افغانستان د خبریالانو د ملاتړ سازمان (AJSO) د ښځینه خبریالانو د وکالت کمېټې د طالبانو له نوې پرېکړې سره په غبرګون کې، چې د ننګرهار ولایت کې ښځینه خبریالانو ته د شرعي محرم پرته د تګ راتګ اجازه نه ورکوي، په یوې خپره شوې اعلامیه کې، په کلکه غندلي دي.په دې اعلامیه کې، چې نن (سه‌شنبه، د جوزا ۱۳مه) خپره شوې، ویل شوي چې دا پرېکړه نه یوازې د ښځو بنسټیز حقونه ښکاره ډول نقضوي، بلکې د رسنیو ازادي او د خلکو د ازادې لاسرسي حق ته هم جدي ګواښ پېښوي.دغه کمیټه ټینګار کوي چې ښځینه خبریالانې، سره له ډېرو ګواښونو، د خلکو، په ځانګړې توګه د زیانمنو قشرونو غږ رسولي او پر دوی دا ډول بندیزونه وضع کول، په حقیقت کې له رسنیز ډګره د دوی تدریجي حذف ته لاره هواروي.د ښځینه خبریالانو د وکالت کمېټه له نړیوالو ادارو، د بشر حقونو مدافع سازمانونو او د ملګرو ملتونو له استازو غوښتي چې د طالبانو پر دغو ښځو ضد پالیسیو چوپ پاتې نه شي او د ښځو د آزاد، مؤثر او خوندي حضور لپاره په رسنیو کې عملي ګامونه پورته کړي.دغه اداره همداراز له طالب چارواکو غوښتي چې د تبعیض‌پر بنسټ بندیزونو نه، بلکې د ښځو د برابر ګډون زمینه برابره کړي، په تېره بیا په رسنیز ډګر کې. دوی خبرداری ورکړی چې د دغه ډول سیاستونو دوام به افغانستان لا ډېر نړیوال انزوا ته ټېل وهي.