په وینا او عمل کې تضاد؛ د طالبانو د امر بالمعروف وزیر د خلکو خصوصي حریم ته لاس‌وهنه منع اعلان کړه

سره له دې چې د طالبانو د امر بالمعروف مأمورین تل د خلکو د فردي ازادیو په نقض تورن شوي، خو خالد حنفي، د دې وزارت سرپرست، ادعا کړې چې هېڅ‌چا ته اجازه نشته چې د خلکو موبایل، جېب یا کور ته لاس‌وهنه وکړي.هغه نن (سه‌شنبه، د جوزا ۱۳مه) د اختر ورځو لپاره د «احتساب» د تطبیق په تړاو یوه سمینار کې وویل:«اسلام د افرادو په شخصي حریم تېری روا نه ګڼي.»دا څرګندونې داسې مهال کېږي چې د طالبانو د امر بالمعروف ځواکونه پراخ حضور لري او څو څو ځله د خلکو په شخصي ژوند کې د لاسوهنې، د ښځو په سپکاوي او د سختو بندیزونو په اعمالولو تورن شوي دي.خو خالد حنفي هم‌مهاله د امر بالمعروف او نهی عن المنکر د قانون پر پوره پلي کېدو ټینګار کړی او خپلو مأمورینو ته یې د «اسلامي نظام د تطبیق منتخب کسان» ویلي دي.دا قانون، چې تېر کال د اسد په میاشت کې د طالبانو له‌خوا توشیح شو، د ټولنیزو بندیزونو یو لړ احکام لري چې د بشري حقونو نهادونه یې د انساني کرامت ضد ګڼي.