د خوړو نړيوال پروګرام: نږدې ۹.۵ میلیونه افغانان لا هم له سختې خوراکي ناامنۍ سره مخ دي

د خوړو نړيوال پروګرام (WFP) وايي، سره له دې چې د افغانستان د خوراکي امنيت په برخه کې يو څه ښه‌والی راغلی، خو لا هم شاوخوا ۹.۵ میلیونه کسان، چې د ټول نفوس ۲۱ سلنه جوړوي، له جدي خوراکي ناامنۍ سره مخ دي.دې ادارې نن چهارشنبه (د غبرګولي ۱۴مه) خبرداری ورکړی چې د نړیوالو مرستو کموالی، اقلیمي بدلونونه او اقتصادي نازک وضعیت، د ترلاسه شويو پرمختګونو د له‌منځه‌تلو ګواښ پېښ کړی دی.د خوراکي امنیت د IPC مرحلې د وروستي ارزونې له مخې، چې د مې څخه تر اکتوبر ۲۰۲۵ پورې موده رانغاړي، شاوخوا ۱.۶ میلیونه کسان په اضطراري حالت (IPC څلورمه مرحله) او نږدې ۷.۹ میلیونه نور په بحراني حالت (IPCدریمه مرحله) کې دي.دا په داسې حال کې ده چې په تېر پړاو کې، د مارچ تر اپریل ۲۰۲۵ پورې، ۱۲.۶ میلیونه افغانان، یعنې ۲۷ سلنه نفوس، له خورا جدي خوراکي ناامنۍ سره مخ وو.د دې ادارې ویاند ویلي: «بشري مرستې، کرنیز ملاتړ او د تاوتریخوالي کمښت، وضعیت ښه کړی، خو د مرستو بودیجه ۴۰ سلنه راکمه شوې، چې دا پرمختګونه یې له جدي ګواښ سره مخ کړي.»WFP زیاتوي چې زیان‌پېلې کورنۍ، په ځانګړي ډول ماشومان، ښځینه سرپرستې، او نوي راستانه شوي کسان، تر نورو ډېر د لوږې له ګواښ سره مخ دي. ډېری دغو کورنیو د افغانستان په لرې‌پرته او زیان‌منو سیمو کې ژوند کوي، هلته چې خدمتونو ته لاسرسی ډېر محدود دی.د خوړو نړيوال پروګرام له نړيوالې ټولنې غوښتي چې خپلې مالي ژمنې زیاتې کړي او د افغانستان له مهمو خوراکي او معیشتي ملاتړ پروګرامونو سره مرسته وکړي، څو د بلې خوراکي فاجعې مخنیوی وشي.