د ارغواني شنبې خوځښت: له طالبانو سره خبرې، له جنايت سره همکاري ده

د ارغواني شنبې مدني خوځښت په يوه خپره شوې اعلامیه کې ويلي، چې له طالبانو سره د خبرو او تعامل پاليسي په تېرو څلورو کلونو کې ناکامه شوې او د ښځو پر ضد فشارونه او بندیزونه يې نور هم زیات کړي دي.په دې اعلامیه کې، چې د دوشنبې په ورځ (د غبرګولي ۱۹مه) خپره شوې، طالبان يوه «د خبرو اترو ضد، د فکر دښمنه او ایډیولوژیکه ډله» بلل شوې، چې فکري مخالفان يې د وژلو مستحق ګڼي.د دې خوځښت په وينا، هره هغه هڅه چې طالبانو ته مشروعيت ورکړي، هغوی پاک او یا استازولي ورکړي، له جنايت سره همکاري بلل کېږي او باید له قانوني اړخه وڅېړل شي.معترضو مېرمنو غوښتنه کړې چې طالبان او د هغوی ملاتړي یا لابي‌کوونکي باید د نړيوالو غونډو، په ځانګړي ډول د لوېديځو هېوادونو په کنفرانسونو کې، ګډون ونه لري. هغوی ټينګار کړی چې دا کار د نړیوالو حقوقي ژمنو، په تېره د ملګرو ملتونو د منشور او د ښځو پر وړاندې د تبعیض د له‌منځه وړلو د کنوانسیون (CEDAW) سرغړونه ده.