په ملګرو ملتونو کې د امریکا سفیره او دایمي استازې لینډا توماس ګرینفیلډ وايي، دغه هېواد د طالبانو ملاتړ نه کوي او نه یې په رسمیت پېژني.
نوموړي پرون (سه شنبه د اسد ۱۰مه) په یوه خبري غونډه کې وویل چې افغان نجونې باید زده کړو ته لاسرسی ولري او ښځې هم باید کار ته ولاړې شي.
هغه زیاته کړه چې دغه هیواد پر طالبانو فشار ته دوام ورکوي او له طالبانو سره به هیڅ ډول مرسته ونه کړي.
هغه چې د ملګرو ملتونو د امنیت شورا د راروانې دورې مشري په غاړه لري، ویلي چې په دې موده کې هڅه کوي د بشري او ښځو د حقونو مسایل د دې ادارې په کاري لومړیتوب کې ځای کړي.
د مېرمن ګرینفیلډ دغه څرګندونې په داسې حال کې کېږي چې د طالبانو جګپوړو غړو په دوحه کې له امریکايي چارواکو سره په کتنه کې له نړیوالې ټولنې د افغانستان د حکومت د تسلیمېدو غوښتنه وکړه.
