د خوړو نړيوال پروګرام: که بیړنۍ مالي مرسته ونه‌شي، ميليونونه افغانان به د لوږې له بحران سره مخ شي

د ملګرو ملتونو اړوند د خوړو نړيوال پروګرام (WFP) په خپل تازه ارزونه کې خبرداری ورکړی چې که مالي سرچینې ژر تر ژره برابرې نه‌شي، نږدې ۹.۵ ميليونه افغانان به د ۲۰۲۵ کال د مې تر اکتوبر (د غبرګولي تر وروستیو) پورې له سخت تغذيې بحران سره مخ شي.د دې راپور له مخې، له دې ډلې څخه ۱.۵۹ ميليونه تنه د خوړو د خونديتوب نړيوال سیستم په څلورمه بیړنۍ کچه کې شامل دي او بېړنيو ژغورونکو مرستو ته اړتیا لري.WFP وايي، د سخت مالي کمښت له امله یې فعالیتونه تر هغو کچو راکم شوي چې نور یې د لږ تر لږه عملیاتو د دوام ظرفیت هم نه‌لري، او د ژمي په سړو میاشتو کې د خلکو اړتیاوو ته ځواب نه‌شي ورکولای.همداراز له لوږې سره د سوء تغذيې کچه هم مخ په زیاتېدو ده، چې دا وضعيت ميليونونه ماشومان او بارداره يا شيدې ورکونکي مېرمنې له جدي خطر سره مخ کوي.دغه نهاد وايي، هغه د ښوونځیو د تغذيې پروګرام چې پخوا یې پلي کاوه، د بودجې د بحران له امله د بشپړ بندېدو له ګواښ سره مخ دی، چې له امله به یې شاوخوا ۴۰۰ زره ماشومان له ورځنيو غذايي مرستو بې‌برخې شي. دا حالت ممکن د زده کړو پرېښودو، په ځانګړي ډول د نجونو، لامل شي او د زده کړو لاسته‌راوړنې له منځه يوسي.په راپور کې دا هم ویل شوي چې د متوسطې حادې سوء تغذيې اړوند روغتيايي خدمتونه په ۱۶ ولايتونو کې بشپړ بند شوي، او د خوړو ګرځنده ټيمونه په ۹۸ ولسوالیو کې کم شوي. په ټولیزه توګه، ۱۴۲ تغذيې مرکزونه تړل شوي، چې دا وضعیت له ۱۳۵۰۰ ماشومانو او ۹۱۵۰ ښځو سره مستقیمه اغېزه کړې ده.خوړو نړیوال پروګرام وايي، سره له دې چې د پاکستان له لوري د کډوالو راتګ کم شوی، خو د ایران له خوا د اسلام‌قلعه بندر له لارې هره ورځ شاوخوا ۱۷۰۰ کسان افغانستان ته اوړي.WFP زیاتوي چې د کډوالو د بیړنیو مرستو لپاره د سرچینو د غور له امله، مرستې ځينو بحراني سیمو ته ځنډېدلي دي.دغه سازمان وړاندوینه کړې که بیړنۍ مالي مرسته ترلاسه نه‌شي، نو د راتلونکي ژمي په بهیر کې به ونه‌شي کولای چې د خپل لومړني پلان له مخې ۶ ميليونه کسانو ته رسېدنه وکړي.