د کبرا رضايي قاتل د ایران د پولیسو په عملیاتو کې نیول شوی دی

د افغانې کډوالې، ۲۶ کلنې کبرا رضايي د زړه‌بوږنوونکي قتل په تړاو، د تهران د پیشوا ښار پولیسو اعلان کړی چې د دې پېښې شکمن کس نیول شوی دی.اکبر عربي، د یاد ښار د پولیسو قوماندان، د جمعې په ورځ (د غبرګولي ۲۳) ایراني رسنیو ته ویلي، چې دغه شکمن د امنیتي ځواکونو د استخباراتي او عملیاتي هڅو په پایله کې پېژندل شوی او نیول شوی دی.نوموړی زیاتوي، نیول شوي کس د قتل اعتراف کړی او دا مهال په توقیف خونه کې بندي دی.سره له دې، د نوموړي هویت او انګېزه لا هم د ایراني چارواکو له خوا نه ده افشا شوې.تر دې مخکې، د انصاف نیوز خبري او تحلیلي ویب‌پاڼې د چهارشنبې په ورځ، د غبرګولي ۲۱، د باوري سرچینو له قوله راپور ورکړی و، چې د کبرا رضايي جسد، چې نږدې دوه میاشتې ورک وه، د یوه ۳۲ کلن ایراني سړي په کور کې موندل شوی دی؛ یاد کس اوس د قتل، د جسد ټوټه کولو او د جرم د نښو د له منځه وړلو په تور نیول شوی دی.په غبرګون کې، طالبان هم له ایراني قضايي ادارو غوښتنه کړې چې دې پېښې ته جدي رسېدنه وکړي.