د بشر د حقونو د څار بنسټ: د افغان ښځو د ځپنې د پای ته رسولو لپاره دې نړیوال د حساب ورکونې مېکانیزم جوړ شي

د بشر د حقونو د څار بنسټ ویلي، چې ریچارد بنت، د افغانستان لپاره د ملګرو ملتونو ځانګړي راپور ورکوونکی، یو ځل بیا د یو خپلواک، هر اړخیز او نړیوال مېکانیزم د جوړېدو غوښتنه کړې، څو د بشري حقونو پراخو سرغړونو، په ځانګړې ډول د ښځو او نجونو د سیستماتیکې ځپنې، ځواب ویونکی وي.ښاغلي بنت د جمعې په ورځ (د غبرګولي٢٣) په خپل تازه راپور کې په افغانستان کې پر ښځو او نجونو د بېلابېلو بڼو تبعیض ته اشاره کړې او ویلي یې دي چې دوی نه یوازې له خپلو اساسي حقونو بې‌برخې شوې دي، بلکې قضايي نظام هم د دوی د خوندیتوب پر ځای، د هغوی د ځپلو او غلي کولو وسیله ګرځېدلې ده.نوموړي له دولتونو غوښتي، چې یو داسې حساب ورکونکی جوړښت رامنځته کړي چې پراخ ماموریت ولري او د بشري حقونو د سرغړونو او نړیوالو جرمونو، لکه د جنسیتي ځورونې او تعقیب، شواهد راټول، خوندي او مستند کړي.بنت زیاتوي، دا مېکانیزم کولی شي د نړیوال جزايي محکمې روانو هڅو، د ښځو پر ضد د تبعیض د له منځه وړلو کنوانسیون له مخې په نړیواله محکمه کې د روانو قضیو، او د نړیوال صلاحیت له لارې د قضایي تعقیب ملاتړ وکړي.د بشر د حقونو د څار بنسټ ټینګار کړی چې دا مېکانیزم باید هر اړخیز وي، او یوازې پر روانو قضیو تمرکز ونه لري، بلکې د تېر وخت سرغړونې هم وڅېړي. دغه بنسټ وايي، باید د عدالت پروسه د دوه‌ګوني چلند یا انتخابي چلند له امله زیان ونه ويني.که څه هم نړیوال ملاتړ د داسې یوه مېکانیزم د جوړېدو لپاره مخ پر زیاتېدو دی، اټکل کېږي چې اروپايي ټولنه به د سپتمبر په میاشت کې د افغانستان په اړه د خپلې کلنۍ پرېکړه‌لیک وړاندې کولو پر مهال، رسماً د دې طرحې وړاندیز وکړي.ټاکل شوې ده چې د ملګرو ملتونو د بشري حقونو شورا راتلونکې اوونۍ د ریچارد بنت راپور وڅېړي، او د بشر د حقونو د څار بنسټ له ټولو هېوادونو غوښتي چې د افغانستان لپاره د حساب ورکونې د مېکانیزم د جوړېدو ملاتړ وکړي.