طالبان: د حج په مراسمو کې لس افغان حاجیان مړه شوي دي

د طالبانو د حج او اوقافو وزارت سرپرست، نورمحمد ثاقب، ویلي چې سږ کال د حج مراسمو پر مهال لس افغان حاجیان مړه شوي دي. د نوموړي په وینا، له دې ډلې څلور ښځې او شپږ نارینه شامل دي.نوموړي دا څرګندونې له طالبانو سره تړلې ملي ټلوېزیون ته کړې دي او ویلي یې دي چې دوه تنه د ترافیکي پېښې له امله، او نور اته تنه د ناروغۍ یا طبیعي مړینې له امله مړه شوي دي.د ورکړل شویو معلوماتو له مخې، دوه کسان په مدینه، یو تن په عرفات، او پاتې اووه تنه په مکه کې مړه شوي دي.ښاغلي ثاقب زیاته کړې چې دا پېښې د افغان حاجیانو د لېږد له پیله تر اوسه ثبت شوې دي، او د کورنیو په رضایت، د مړو جسدونه په سعودي عربستان کې خاورو ته سپارل شوي دي.سږ کال نږدې ۳۰ زره افغانان د حج مراسمو لپاره سعودي عربستان ته تللي وو. د حاجیانو د بېرته ستنېدو لړۍ پنځه ورځې مخکې پیل شوې ده او په لومړي پرواز کې ۳۴۶ تنه کابل ته راستانه شوي دي.