ملګري ملتونه: ۳.۵ میلیونه افغان ماشومان له شدیدې خوارځواکۍ سره مخ دي

د ملګرو ملتونو درې اړوند بنسټونه خبرداری ورکړی چې په افغانستان کې د ماشومانو خوارځواکي بیړني حالت ته رسېدلې ده. د دوی د نوې راپور له مخې، له پنځو کلونو کم عمره شاوخوا ۳.۵ میلیونه ماشومان د شدیدې خوارځواکۍ ښکار دي، چې له دې ډلې لږ تر لږه ۱.۴ میلیونه ماشومان د خطرناکې ډېرې ډنګروالي له امله له مړینې سره مخ دي.یونیسف، د روغتیا نړیوال سازمان، د خوړو نړیوال پروګرام (WFP) او د نفوس صندوق (UNFPA) په ګډ راپور کې ویلي چې افغانستان د هغو ۱۵ هېوادونو له ډلې دی چې تر ټولو لوړه د ماشومانو ډنګروالي تجربه کوي.راپور ښيي چې ۹۰ سلنه افغان ماشومان له کافي او بیلابیلو خوړو بې‌برخې دي. همداراز، شاوخوا ۴۰ سلنه ښځې هم له خوارځواکۍ کړېږي چې دا یوه ستونزه چې زیاتره وخت له پامه غورځول کېږي.دغه بنسټونه د اقتصادي بحران، وچکالۍ او د خوراکي توکو نه‌امنۍ په پام کې نیولو سره، د خوارځواکۍ د مخنیوي، تشخیص او درملنې لپاره پر بیړني اقداماتو ټینګار کړی دی. دوی خبرداری ورکړی چې دا ستونزه یواځې یو روغتیایي بحران نه‌دی، بلکې د افغانستان د راتلونکي او دوامدار پرمختګ لپاره یو جدي ګواښ دی.دوی له نړیوالې ټولنې غوښتنه کړې چې د هېواد د روغتیا، کرنې، ټولنیز ملاتړ او زده‌کړې د نظامونو د پیاوړتیا لپاره پراخې پانګونې وکړي. د راپور له مخې، چټک ګډون کولای شي د زرګونو ماشومانو ژوند وژغوري او د سولې او ثبات بنسټ کېږدي.دا راپور په داسې حال کې خپرېږي چې د روغتیا نړیوالې ټولنې د تغذیې نړیوال موخو تر ۲۰۳۰ کال پورې تمدید کړي او له ټولو هېوادونو یې غوښتي چې د افغانستان د تغذیې له بحران سره په همغږۍ او یووالي سره مقابله وکړي.