ریچارډ بنت به نن د افغانستان د بشري حقونو راپور د ملګرو ملتونو شورا ته وړاندې کوي

ریچارډ بنت، چې د ملګرو ملتونو ځانګړی راپور ورکوونکی، اعلان کړی چې خپل تازه راپور به نن دوشنبه (۲۶ د غبرګولی) د ملګرو ملتونو د بشري حقونو شورا ۵۹مې غونډې ته وړاندې کړي.دغه راپور د ښځو او نجونو پر وضعیت تمرکز کوي او خبرداری ورکوي چې په افغانستان کې د بشري حقونو بحران لا ژور شوی دی.د راپور د یوې خپرې شوې نسخې له مخې، د طالبانو تر واکمنېدو وروسته د پخواني حکومت عدلي نظام له منځه تللی او مهم قوانین لکه د جزا قانون، د ښځو پر ضد د تاوتریخوالي قانون او د ماشومانو د حقونو قانون – یا لغو شوي او یا هم بې‌اغېزې دي.بنت ویلي، طالبان د واضحو قوانینو پر ځای شفاهي فرمانونه او سخت‌ چلند مذهبي احکام عملي کوي، چې له امله یې ښځو ته عدالت ورکول ناممکن شوي دي.راپور څرګندوي چې ټولې ښځینه قاضیانې، څارنوالانې او مدافع وکیلانې له عدلي نظام ایستل شوي او اوس نه یوازې دا چې د عدلي نظام برخه نه‌دي، بلکې اجازه هم نه‌لري چې خپلواکه توګه محکمې ته ولاړې شي.همداراز ویل شوي چې ډېری ښځې چې د تاوتریخوالي، جنسي تېري، جبري ودونو یا د میراث نه‌ورکولو قرباني دي، حتی دا توان نه‌لري چې ساده دعوا ثبت کړي.راپور د ښځو لپاره د علني سزاوو، لکه دورې وهلو او اعدامونو یادونه هم کړې چې زیاتره پرته له قانوني پروسې او له مدافع وکیل پرته ترسره کېږي.ریچارډ بنت دا وضعیت «جنسیتي اپارتاید» بللی او ویلي یې دي چې اوسنی قضایي جوړښت نه یوازې د ښځو ملاتړ نه‌کوي، بلکې د هغوی د عدالت تر ټولو لوی خنډ دی.نوموړي له نړیوالې ټولنې بیا غوښتنه کړې چې طالبان دې په رسمیت نه‌پېژني او له نړیوالو عدلي میکانېزمونو، په ځانګړي ډول له نړیوال جزایي محکمه، ملاتړ ته دوام ورکړي.په ټوله کې د بنت راپور دا بیانوي چې عدالت په افغانستان کې د ټولنې له نیمايي برخه نه یوازې لرې شوی، بلکې عمداً ترې اخیستل شوی دی.