فرشته عباسي: د طالبانو عدلي نظام د ښځو د حذفېدو وسیله ګرځېدلی

په جینیوا کې د ملګرو ملتونو د بشري حقونو شورا د ۵۹مې ناستې پر مهال، د بشري حقونو د څار سازمان د افغانستان څېړونکې فرشته عباسي د افغانستان د بشري حقونو له وضعیت څخه ژوره اندېښنه وښوده او له نړیوالې ټولنې یې وغوښتل چې د ښځو پر وړاندې د ترسره شویو جرمونو د معافیت د پای ته رسولو لپاره ژر او مؤثر ګامونه واخلي.مېرمن عباسي، د ملګرو ملتونو د ځانګړي راپور ورکوونکي ریچارډ بېنت د وروستي راپور په استناد وویل، شواهد ښيي چې د طالبانو تر واکمنۍ لاندې د ښځو او نجونو حقونه په سیستماتیک او هدفمند ډول تر پښو لاندې شوي دي؛ هغه کړنې چې نه یوازې جنسیتي تاوتریخوالی بلل کېږي، بلکې د بېنت په ګډون د کارپوهانو له‌خوا یې صراحتاً «جنسیتي اپارتاید» یاد شوی دی.هغې زیاته کړه: «اوسنی عدلي نظام نه یوازې د ښځو ملاتړ نه کوي، بلکې عملاً د هغوی د ځپلو، عدالت د نه تأمین او له ټولنیز ژوند څخه د بشپړ ایستلو وسیله ګرځېدلی دی.»عباسي ټینګار وکړ چې د نړیوالې ټولنې بېړنی ګام، په ځانګړي ډول د یوه خپلواک حساب ورکولو میکانیزم جوړول، کولی شي د معافیت کلتور ته د پای ټکی کېږدي او افغان ښځو ته یو نوی امید ورکړي.په همدې ناسته کې، د ملګرو ملتونو د بشري حقونو عالي کمېشنر وولکر ترک هم د ښځو د وضعیت په اړه اندېښنه وښوده او ویې ویل چې افغان ښځې او نجونې له ټولنیز ژوند څخه ایستل شوې دي او د معلولیت لرونکو او همجنس‌پالو په ګډون د زیان‌منو ټولنو وضعیت ورځ تر بلې خرابېږي.