د بشري حقونو شورا ناسته کې د هېوادونو استازو: طالبان دې حساب ورکوونکي شي

د ملګرو ملتونو د بشري حقونو شورا په ۵۹مه ناسته کې، د کاناډا، ایټالیا، اندونیزیا، قطر، ایرلنډ، سویس، جنوبي افریقا او نورو له لسو زیاتو هېوادونو استازو د افغانستان د بشري حقونو د روانو سرغړونو، په ځانګړې توګه د ښځو او اقلیتونو د وضعیت په اړه ژوره اندېښنه څرګنده کړه او ټینګار یې وکړ چې د طالبانو رژیم باید د خپلو کړنو په وړاندې حساب ورکوونکی وګرځي.یاده ناسته د غبرګولي په ۲۶مه ترسره شوه او د افغانستان لپاره د بشري حقونو د شورا ځانګړي راپور ورکوونکي ریچارډ بېنت په کې د عدالت ته د لاس‌رسی او د ښځو او نجونو د حقوقي وضعیت په اړه خپل تازه راپور وړاندې کړ.بېنت وویل چې د طالبانو تر واک لاندې عدلي نظام ښځې له عدالت څخه بې‌برخې کړې دي او دا نظام اوس د مذهبي شفاهي فرمانونو پر بنسټ، یو غیر رسمي او مبهم جوړښت ته بدلون موندلی دی.د دې راپور په غبرګون کې، یو شمېر هېوادونو په افغانستان کې د علني اعدامونو د درولو غوښتنه وکړه او له دوامداره جنسیتي ځورونې، د ښځو د سرکوب او د مدني ازادیو د پراخو بندیزونو په اړه یې خبرداری ورکړ.دغه هېوادونه د افغان ښځو او نجونو لپاره، په ځانګړې توګه د پوهې او زده‌کړو په برخه کې، د عملي ملاتړ پر اړتیا ټینګار وکړ او د همکاریو ژمنې یې ورکړې.استازو همداراز د ښځو تر څنګ، د هزاره ټولنې، مذهبي اقلیتونو او همجنس‌پالو د وضعیت په اړه ژوره اندېښنه وښوده.ریچارډ بېنت په خپل راپور کې یادونه وکړه چې ټولې ښځینه قاضیانې، وکیلانې او سارنوالانې له کاره لېرې شوي او د تاوتریخوالي قرباني ښځې آن د دې وس نه لري چې محکمې ته رسمي شکایت وړاندې کړي.نوموړي وویل، اوسنی نظام نه یوازې له ښځو عدلي عدالت اخیستی، بلکې خپله د سرکوب او تبعیض وسیله ګرځېدلی دی.بېنت د «جنسیتي اپارتاید» اصطلاح په کارولو سره، د بشري حقونو د سرغړونو د څېړلو لپاره د یوه خپلواک او نړیوال میکانیزم د جوړېدو غوښتنه وکړه او له نړیوالې ټولنې یې وغوښتل چې د سیاسي او حقوقي فشارونو په زیاتولو سره، د افغانانو له لا زیات کړاو څخه مخنیوی وکړي.