یونیسف: نیمايي افغان ماشومان له سختې خوړو کمښت سره مخ دي

د ملګرو ملتونو د ماشومانو ملاتړ صندوق (یونیسف) ویلي، نږدې ۹۰ سلنه افغان کوچني ماشومان له خوړو کمښت سره مخ دي، او نیمايي یې د سخت د خوړو بیوزلي تجربه کوي.یونیسف د دوشنبې په ورځ، د غبرګولي ۲۶مه راپور ورکړی چې د دې بحران په غبرګون کې یې د بریتانیا د بهرنیو اړیکو، ګډو چارو او پراختیا ادارې (FCDO) په همکارۍ، یو پراخ پروګرام په نوم “د افغانستان لومړني خواړه” پیل کړی دی.دا څو اړخیزه نوښت، چې له ۲۰۲۵ تر ۲۰۲۸ پورې به دوام کوي، موخه یې د دوه کلنۍ نه کم عمره ماشومانو تغذیه ښه کول دي. پروګرام د کورني تولید، مغذي خوړو برابرولو او د ماشوم-محور خوړو سیستمونو پر پراختیا تمرکز لري.د یونیسف استازي تاج‌الدین ایوال ویلي: «دا بحران یو چوپ درد دی. افغان ماشومان یوازې د خوړو له کمښت سره نه، بلکې د ودې او پرمختګ له بنسټیزو اړتیاوو بې‌برخې دي. د هیواد نیمايي کوچني ماشومان یواځې له دوو خوړو ګروپونو خواړه خوري، چې دا هغوی د سخت خوارځواکۍ او حتی مرګ له خطر سره مخ کوي.»دا پروګرام به د هېواد په ۳۴ ولایتونو کې پلي شي او شاوخوا ۱.۷ میلیونه ماشومان به تر پوښښ لاندې راولي. تمرکز به یې پر کورني کچه د مغذي خوړو چمتو کولو، د درملنیزو او اضافي خواړو تولید پیاوړي کولو، او له ټولنې، روغتیايي خدمتونو، اوبو، فاضلاب، ټولنیز خوندیتوب او زده‌کړو سره پر همغږۍ وي.یونیسف ټینګار کړی چې دا یوازې یو پروژه نه ده، بلکې یو حرکت دی، چې موخه یې د ماشومانو د خوارځواکۍ پر وړاندې مبارزه له سره تعریفول دي. دغه بنسټ له نړیوالو ادارو، تمویل کوونکو، خصوصي سکتور او نړیوالې ټولنې غوښتنه کړې چې د افغانستان د راتلونکي نسل د ژغورنې په دې هڅه کې ونډه واخلي.