ملګرو ملتونو: افغان ښځې له ټولنیزو، اقتصادي او سیاسي برخو بشپړې ایستل شوې دي

ملګرو ملتونو د ښځو څانګې په تازه راپور کې ویلي چې په افغانستان کې د ښځو او نجونو ونډه په ټولو برخو کې صفر ته رسېدلې ده.راپور زیاتوي چې افغانستان دا مهال د نړۍ دویم تر ټولو لوی جندر واټن لري او د طالبانو له واک ته رسېدو وروسته، ښځې له ټولو ملي او محلي پرېکړو کوونکو بنسټونو ایستل شوې دي.د راپور له مخې، د طالبانو له خوا د ښوونځیو د بندېدو له کبله هیڅ یوه نجلۍ د متوسطې دورې زده‌کړې نه‌شي کولی.د ښځو د وضعیت دا راپور چې د ملګرو ملتونو د «زنان سازمان» له خوا خپور شوی، تر اوسه تر ټولو پراخ تحلیل بلل شوی چې د طالبانو له واکمنېدو راوروسته د جنسیتي نابرابرۍ څرنګوالی ښيي.د ملګرو ملتونو یوه مشره سوفیا کالتورپ وايي: «له ۲۰۲۱ کال راهیسې، د افغان ښځو پر حقونو، کرامت او حتا موجودیت یوه بې‌سارې قصدي حمله شوې ده. سره له دې چې نږدې ټول ژوند یې محدود شوی، خو افغان ښځې لا هم مقاومت کوي.»په راپور کې راغلي، افغان ښځو یوازې ۱۷ سلنه د خپلو وړتیاوو کارولی، همداراز یوازې ۲۴ سلنه ښځې په کار بازار کې حضور لري، په داسې حال کې چې دا شمېره د نارینه‌وو لپاره ۸۹ سلنه ده.زیاتره ښځې په ناپایدارو، کم معاشه او بې‌حقوقه دندو کې ښکېلې دي. د مرستو د کمښت له امله ۳۰۰ د مور او ماشوم د تغذیې مرکزونه او ۲۱۶ د تاوتریخوالي ضد مرکزونه تړل شوي دي.ملګري ملتونه خبرداری ورکوي چې د ښځو سیستماتیک ایستل به نه یوازې د پایدار پرمختګ او جندر برابرۍ خنډ شي، بلکې فقر او بې‌ثباتۍ ته به هم زمینه برابره کړي.