ملګري ملتونه: د افغان ښځو ونډه د مرستو رسونې په برخه کې حياتي او نه‌بدلېدونکې ده

ملګرو ملتونو د طالبانو له لوري پر ښځو د بندیزونو د زياتېدو له امله اندېښنه ښوولې او ټينګار کړی چې د افغان ښځو فعال حضور د بشري مرستو په پروګرامونو کې اړين دی.د ملګرو ملتونو د بشري مرستو د همغږۍ دفتر (اوچا) د چهارشنبې په ورځ (د غبرګولی ٢٨مه) يو بيان خپور کړی چې په کې د دې سازمان ځانګړې استازې سوزان فرګوسن ويلي، د ژغورنې هغه خدمتونه چې په افغانستان کې وړاندې کېږي، يوازې د ښځو په ملاتړ او ګډون دوام کولی شي.مېرمن فرګوسن د مرستندويه بنسټونو افغان ښځو ته د زړورتيا نښه ويلي او زياته کړې یې ده چې دا ښځې، سره له جدي ګواښونو، لا هم د اساسي مرستو په وړاندې کولو کې د بې‌وزلو او اړمنو ټولنو په لومړۍ کرښه کې ولاړې دي.نوموړې ويلي: “حتی د سختو بندیزونو تر سیوري لاندې، افغان ښځينه مرستندویانې لا هم د خپلو ټولنو، د يو بل او د راتلونکي لپاره حاضرې دي. د هغوی کار د خورا زیان‌منو او لیرو پرتو ښځو او نجونو لپاره حیاتي دی. دا په یوه له تر ټولو ننګولو ډکو هېوادونو کې د مرستندویو ښځو لپاره یو ورځنی زړور عمل دی.”دا څرګندونې داسې مهال کېږي چې د اوچا د وروستي راپور له مخې، په وروستيو مياشتو کې لږ تر لږه ۲۹ تنه بشري کارکوونکي ـ چې زياتره یې ښځې وې ـ د طالبانو له‌خوا نیول شوي او ځورول شوي دي.